“Një i burgosur u lirua natën, kreu vrasjen dhe u kthye në qeli”. – Gazetari habit në “Zona Zero”

2 SHKURT 2022

Gazetari Fatos Mahmutaj ka folur për problematikën në burgjet shqiptare, pas aksionit policor dje në Elbasan.

Në një lidhje skype me emisionin “Zona Zero”, ai u pyet nga gazetari Thimi Samarxhiu se si mund t’i jepet fund korrupsionit në burgje.

Mahmutaj dha disa ide duke treguar në hollësi problemet në burgje, e madje tregoi dhe rastin e një të burgosuri që u lirua natën, vrau dikë, dhe u kthye në burg ditën.

“Korrupsionit në burgje mund t’i jepet fund, por në radhë të parë duhet parë me kujdes personeli i burgjeve. Pjesa më e madhe e tyre vijnë me masa disiplinore.

E nisim nga policët. Pjesa më e madhe e tyre janë ata që janë shkarkuar për shkelje disiplonre në Policinë e Shtetit, dhe kalojnë te Policia e Burgjeve. Se burgjet nuk e kanë të plotësuar numrin e personelit, dhe prandaj mbyllnin një sy. Problemi tjetër është stafi civil i burgjeve, s’dua të flas me emra, se i kam monitoruar burgjet, dhe kam hasur që stafi civil ishin ose njerëz problematikë, ose njerëz që nuk bënin dot punë të tjera. Pra edhe këta ishin të përjashtuar nga diku.

Në një rast kemi gjetur një thes me hashash, kemi gjetur sende të paligjshme, thika, bajoneta. Këto janë raste ekstreme që vijnë nga të korruptuarit, një rast tjetër, një i burgosur u lëshua natën, shkoi në një rreth larg vendit ku ishte, dhe në mëngjes u kthye në qeli. Dëshmitarët u zeruan dhe të gjithë thanë që s’ka lëvizur fare,” tha gazetari.

Gazeta Shqip